六堆生活學院

文/黎華亮（六堆生活學院志工）

你擺好臺灣寶島地圖
手指公同矮指杈穩高雄、屏東
用紅筆對甲仙、六龜
跈等手巾寮畫到高樹
這兜所在安著右堆。
荖濃溪在這做得坐船仔搞水
肚飢吔轉來美濃食面帕粄
還有四炆四炒好料个
再去高樹摘荔果嚐甜
包你兜人還想再來
交通工具愛駛車仔較遽。

下來屏東縣境
長治、麟洛兩鄉就係前堆
愛去山地門看姑娘跳舞
愛去墾丁食飛魚大餐
參觀客家文化園區
看打採茶、做大戲
去鄭成功廟瞻仰先賢
心情一定蓋紮實
下來一定愛去食六堆口香糖
噍到你牙齒留香又酸軟
駛車仔較看得過多著

隔壁靠東片就後堆
係六堆个中心點--內埔鄉
有古蹟老媽祖宮
有全臺只此一家
別無分號个昌黎祠
係現代學子考生崇拜个
考神--韓愈廟堂。
對面榕樹下个面帕粄、米篩目
還有豬膽肝全國聞名
傍釅酒盡合味
係愛來沿屏鵝公路內埔下車。

再下背係萬巒鄉先鋒堆
對頭溝水到五溝水
去看大宅院劉氏宗祠
還有武舉人瓦厝
東港溪上游帕哥仔釣毋歇
萬巒豬腳食毋畏係有仙人井
萬巒妹人人講伊盡白淨
泗溝水人撑排仔過河壩
阿石哥釣蝦蟆落線毋得
山歌溜天同掌牛郎搭唱
騎自轉車吹野風盡暢喔！

潮州往南係左堆
新埤、佳冬看古蹟
蕭家古宅五進房
楊氏宗祠有太極兩儀池
六根茄冬大樹得揚名
蓮霧滿莊植，沿路滿樹香
黑珍珠仙甜又大粒
新埤弓蕉大條又打口
買一包檳榔來噍
昏頭轉腦看毋識細妹恁靚
佳冬有火車，新埤愛坐自動車。

「六堆風雲」有鍾振斌六堆謠
盡湊句，盡好聽、盡好記
「前後左右中先鋒
　六堆名揚高屏東
　前面長治同麟洛
　後背內埔南北通
　新埤左堆並佳冬
　右片高樹同美濃
　忠義竹田做適中
　萬巒勇敢打先鋒」
來尞啊！行春時節盡好遶喔！

六堆係麼个？係講
清康熙六十年(一七二一)
鴨嫲王朱一貴作亂
高屏客家人組六隊義勇軍
保家衛國，奮勇抵抗
「堆」就係「營」就係「隊」
亂事平定皇帝敕建「忠義亭」
西勢並有客家文物館
變成六堆精神堡壘
六堆精神就係硬頸毋屈服
來看喔！客家人盡熱忱，盡多故事。

創作理念

「六堆」一詞，毋係地名。佢係南臺灣高屏地區一帶講四縣話客家人个聚落。西元一七二一年因抵抗朱一貴之亂所結集个義勇軍，分做先鋒堆、中堆、前段、後段、左堆、右堆六營，以後堆內埔昌黎祠為指揮中心。亂平後，清康熙皇帝為褒獎這兜義勇軍，特敕建「忠義亭」於西勢（中堆），奉祀先烈英靈，成為六堆精神堡壘。

六堆因都係客家莊，有客家人特殊个人情風俗，有不同味緒个點心，有美麗个山光水色，盡好尞，盡好搞，歡迎觀光客前來遶尞，增進族群和諧，提高多元文化个價值。