六堆生活學院

作者：黎華亮（六堆生活學院志工、屏東縣客家文物館解說員）

做學生仔盡望一擺畢業旅行，做志工也異想來一次參觀活動；看看別儕志工仰般做，做耶麼个分人看，也學兜息把功夫，添作自家能量，驚怕分人取笑：井肚个蝦蟆無知漦。

這日仔就等到咧，由客家事務處創辦个六堆生活學院安排，在十一月七、八兩日，參訪嘉義、埔里兩地社區志工團隊，使ngaiˇ等大開眼界，如魚得水、如虎添翼，不虛此行，收穫良多。

頭日到嘉義新港鄉社區，在新港文教基金會館舍，聽一位工作人員講十五萬元創會个故事。原來只要一位醫生、一儕藝人，加上熱心个志工就能做大事。Ngaiˇ等輒常想：有錢能使鬼推磨，有錢就好辦事。其實佢等三分靠錢，七分靠人，也搞得有聲有色。佢等靠志工，從年齡最小个小學生、中學生、大學生，都有事好做；而且各有所長，自由發揮，各有所用，盡力而為。將一个小小農村，打造一所「遊戲生活圈」，使社區居民有休閒地方，尋到自家生活內容，像農民第二個家。而建造文物館，其中就有圖書館，藏書三萬冊，開啟了知識泉源，心靈个視窗，哺餵精神食糧，對農民係一種幸福與感恩。又借新港鄉農會倉庫做為活動場所，這擺展出做穡人个心聲，替農民出一口氣，減少社會紛爭。同時還作國際文化交流門窗，就係希望下一代毋好變壞。這種社區關懷，慈悲照見希望个作為，有錢買無到，志工們眾志成城个好榜樣。

近日通過个「客家基本法」，就有創新客家文化產業个目標，ngaiˇ相信只要「誠心」、「用心」、「一新」，無有不水到渠成之道理。

ngaiˇ還得到一項知識，「香」原來毋係拿來拜神佛耶，係九天玄女父親因病不能吞嚥，將中藥研成粉末，點燃焚香，用吸入法治病，效果共樣。於是九天玄女成仙後，為了感念佢个功德，人家也焚香到天庭來紀念佢个孝心。今下環保觀念盛行，祖宗神明都怕寂寞，初一十五點支香，也係敬神，鼻着所謂「明德馨香」。

唐人詩講：春日在天涯，天涯日又斜。時光美好在異鄉，一天又向晚。俗話講：未晚先投宿，雞鳴早看天。臨暗時開到南投縣埔里鎮桃米農莊，在樹蛙亭个田園廚坊，享受有美人腿个晚餐補充體力，夜宿桃米社區个三茅屋民宿，老闆還帶大家去尋樹蛙，都用相機拍下來回憶。



第二朝天未明，確實聽到雞鳴，趕緊hong床，遶一下環境，竟都係民宿，無狗吠聲，庭園雅致，花木扶疏，還可以看到暨大燈海，這時節山櫻花也綻放，在「青蛙阿婆个家民宿」，格外清靜幽深了。

九時出發，去看這個把青蛙叫做主人个地方—桃米社區踏查。由桃米資深解說員李盈盈小姐帶領，tenˇ等桃米坑溪邊步道一路行到紙教堂，想毋到一條細細溪水，封溪列為濕地後，溪上有溪哥魚，一直翻身扁白在嬉遊，讓遊客驚奇雀躍，還建造兩片可以蹺起來个木橋，兩邊過橋个人同時到達才合起來走過去，就安着「同心橋」，盡吸引人个觀光奇景。最特別係歸路耶都有百香果、包筍（美人腿），尤其菜園盡像無灑農藥，綠油油摘來就好食，木瓜結實纍纍，幾乎dud着地泥，白蘿蔔黏著紅土，嫩到有水走出來一樣。到親水公園時，村長發一人一枝冰棒，像消防隊个水，熱氣全消。來時還囑大家愛帶外套，但埔里天氣十分宜人。行到紙造教堂—新故鄉Paper Dome，大家趕緊脫下帽仔，放下提袋尋坐个地方，喝喝茶水，馬上就有新故鄉基金會的執行長解說紙教堂个由來。佢講這座紙教堂，係二○○五年一月十七日，在阪神大地震个十週年紀念會項，由新故鄉基金會帶領台灣九二一受災區重建區代表，向日本神戶市鷹取社區爭取，希望將Paper Dome單純溫暖个感覺帶回台灣災區，傳遞一份勇氣同希望，來面對災後个重建。佢等成功咧，而且變成災區个精神支柱。

ngaiˇ覺着桃米生態解說員口才都蓋好，態度又蓋真誠，每解說一項都注入自家个感情，大故事中又有小故事，所以大家蓋專心聽，就像一本書个目錄索引，帶領ngaiˇ等認識社區个精華。據說其中有家庭主婦、水電工、農夫、民宿主人……ngaiˇ看到樹蛙解說員都着制服，穿梭在人群中，隨時為遊客服務，佢等真係社區對外窗口个第一線鬥士，都為營造一個優質个生態環境而努力，重新開啟與家鄉个連結，喚起對大地个珍愛，真个有幸福感以及深度个生態文化之旅，值得ngaiˇ等效法及追念！

回程時順便去參觀南投草屯鎮个國立台灣工藝研究所。這所在又另一番面目，只因國立耶，比起較有鄉土味个社區解說員，這跡位个人員看起來有地位、又高貴感，可能人客多，架勢愛十足，尊嚴就提高。ngaiˇ來耶一下擺，無秩序亂看，麼个都無入心。今下tenˇ等解說員，毋單只增加盡多知識，也學到在眾多遊客跟班時，吵雜、疲勞、無奈……要如何掌握情境？譬論講：ngaiˇ等已精疲力盡想尋凳坐時，解說員不慍不火，仍然面帶笑容，有時還停下來等人集中到齊時才繼續講，耐心、愛心真係解說員个美德。

值得注意係這間工藝研究所展覽个東西，完全係手工藝。當時台灣資本不足，技術又欠缺，發展手工藝係唯一出路。如今已成外銷鼎盛時期，而為了增進品質，才有研究所設立，將能預見21世紀民眾生活中扮演關鍵性角色。

回到頭日暗晡，本來愛去日月潭德化社看夜景。召集人曾老師一句冷話：「老人家都kioi耶！莫去好哩！」而打消。就照原計畫舉辦「我在六堆生活學院的日子—志工服務心得發表」。不辦還好，辦了ngaiˇ毋想講話，ngaiˇ感到寒酸，不被重視。就有人講：「毋好怨嘆喔，係你自己好兜鹽蘸味耶！」當然，敢來就敢當，就敢受！老實講，自家也就學到盡多。古人講：學然後知不足，教然後知困。今下又教又學，真係「教學相長」啦！期望有人稱說：「你講解得真好！」就係最實在个成就。

老子講：既以為人，己愈有；既以與人，己愈多。所以志工朋友愛自詡：毋好問別人能代ngaiˇ做麼个，愛問自家能為大家做麼个？這擺志工之旅，又增加ngaiˇ个信心，ngaiˇ个實力，退休後投入另一領域，重新又學習，毋會癡呆就蓋好哩！下擺來去客庄遶尞，寶刀無鈍喔！